O proxecto nace en 2011, promovido pola Área de Cultura da Vicepresidencia primeira da Deputación de Lugo, coa dirección e dramaturxia de Paloma Lugilde e a documentación aportada por Antonio Reigosa, reunindo unha serie de contos rescatados da nosa tradición oral.

Toma forma nun libro ilustrado acompañado dun CD de audio que pon voz e música á historia dunha familia reunida que nos fará recordar a importancia da narración oral a través de oito contos protagonizados por animais, algunha que outra persoa e elementos como o vento, a auga ou o lume.

A posta en escena do espectáculo conta con cinco intérpretes que, a través da lectura dramatizada apoiada polas músicas orixinais compostas para o proxecto, lévannos a un universo de contos e tradición.